وقفنا على ابواب الذكرى
فوجدت بين صفحاته هذه الأبيات التي أتمنى أن تعجبكم وتنال استحسانكم
وقد تغنى بها الراحل فهد بن سعيد رحمة الله عليه
من ردى الحظ قلبي..طول الأيام خايف
خايفٍ والليالي..ما تجـي لـه بكيفـه
ما تجي له بكيفه..مثل ما كان شايـف
غيب الأيام جاء له..بالظروف الكليفـة
بالظروف الكليفة..والشقاء والكسايـف
والسهر والترجي..بالدموع الـذريفـة
بالدموع الذريفـة..حيل ما هي خفايف
حين ماليلها اظلـم..بالهموم العنيفة
الهمـوم العنيفـة..بالضلـوع النحايـف
خلت القلب يرجـف..بالضلوع النحيفة
بالضلوع النحيفة..بين يأس وحسايـف
وش تفيد الحسايف..والقدر حط سيفه
القدر حط سيفَه..عرْض ما هو مْسَايـف
حال من دون شوفه..ما بقاء غير طيفـه
ما بقـى غير طيفه..داخل القلب طايـف
طيـف زين الوصايف..بالقدود اللطيفـة
بالقدود اللطيفـة..يا لطيـف اللطايـف
يوم جيتـه وجاء لي..بالعبـاة الرهيفـة
بالعبـاة الرهيفـة..ما لها من وصايـف
بالهوى يوم رفَّـت..رف قلبي رفيفـه
رف قلبي رفيفـه..فوق ذيك الردايـف
مع نسائم مساها..فيه فرحة وخيفـه
فيه فرحة وخيفـه..بين وصْل ونكايف
آه يا ويل حالي..والإجازة قصيفه
الإجازة قصيفه..والليالي عجايف
والخطاوي تعرقل..دون زَل القطيفه
دون زَل القطيفه..وابتسام الرهايف
الأمل والأماني..ضاع مني نصيفـه
ضاع مني نصيفه..صيْفها صار زايف
آه لو كنت ماني..مرتبط في وظيفه
مرتبط في وظيفه..لعن أبوها الوظايف
ما عرفت السعادة..لحظةٍ لو طفيفه
لحظةٍ لو طفيفه..شفت ذيك الشفايـف
والعيون النواعِس..والخـدود النظيفـه
الخـدود النظيفـه..بالزهور العطايـف
صرت من دون شوفه..كن عيني كفيفه
كن عيني كفيفه..غيرها الشوف عايـف
ما يبي شوف عيني..غير شوفة وليفـه
غير شوفة وليفـه..سيْد كل الولايـف
آااه يا حسرة اللي..ما اهْـتَنى في مصيفه
ما اهْـتَنى في مصيفه..طول الأيام خايف
خايف والليالـي..ما تجـي له بكيفــه
شعر: د. شائم الهمزاني
الشعر منقول والبطاقات من اعمالي
أحترامي وتقديري
ليست هناك تعليقات:
إرسال تعليق